काठमाडौं– कोभिड–१९ जोखिम भत्ताको माग गर्दै आन्दोलनरत आवासीय चिकित्सकहरुसँग वीर अस्पताल प्रशासनले जोखिम भत्ता उपलब्ध गराउने सहमति गरेको छ ।
वीर अस्पताल प्रशासनले रेजिडेन्ट एसोसिएसन अफ न्याम्स (र्यान)सँग बिहीबार साँझ ४ बुदें सहमति गरेको छ ।
कोरोना संक्रमितको उपचारमा खटिएका सबै आवासीय चिकित्सकहरुलाई सरकारको निर्देशिका अनुसार सम्पूर्ण भत्ता उपलब्ध गराउने सहमति भएको आरएएनका अध्यक्ष डा किरण पाण्डेयले जाकारी दिए ।
गत चैत महिनादेखि हालसम्म कोरोना संक्रमितको उपचारमा खटिएका आवासीय चित्सिकहरुले सबै महिनाको जोखिम भत्ता भने एकमुष्ट नपाउने भएका छन् ।
अस्पताल प्रशासनलेस्वास्थ्य मन्त्रालयबाट प्राप्त बजेट पुर्ण रुपमा उपलब्ध गराउन नपुग्ने भन्दै तत्कालका लागि निश्चित मापदण्डको आधारमा रेजिडेन्ट डाक्टरलाई बजेट अनुसार केही भत्ता प्रदान गर्ने सहमति भएको छ ।
अस्पताल प्रशासनसँग सहमति भएपछि आवासीय चिकित्सकहरुले बिहीबार साँझ आन्दोलनका कार्यक्रम स्थगित भएको घोषणा गरी शुक्रबार देखि नियमित ड्युटीमा खटिएका छन् ।
अस्पताल प्रशासन र आवासीय चिकित्सकबीच भएको ४ बुँदे सहमति
१. चैत महिनदेखी आजका मितिसम्म सधैं अग्रपंक्तिमा रहि कोभिडका बिरामीको उपचारमा खटिएका रेजिडेन्ट चिकित्सकहरु लाई नेपाल सरकारको निर्देशिका बमोजिमको सम्पूर्ण भत्ता उपलब्ध गराउन वीर अस्पताल प्रशासन प्रतिबद्ध छ। हाल मन्त्रालय बाट प्राप्त बजेट पुर्ण रुपमा भत्ता उप्लब्ध गराउन अपर्याप्त रहेको हुँदा तत्कालको लागि निश्चित मापदण्डको आधारमा रेजिडेन्ट डाक्टरलाई बजेटको परिधि भित्र रहि केहि भत्ता प्रदान गर्ने सहमति भएको छ। साथै थप बजेट प्राप्त हुँदासाथ रेजिडेन्ट डाक्टरहरुलाइ पहिलो प्राथमिकतामा राखी बाकी रकम उप्लब्ध गराउने सहमति भएको छ।
२. फागुन महिना भित्रमा वीर अस्पताल प्रशासनले डिउटी रोस्टर र निर्देशिका को आधारमा रेजिडेन्ट डाक्टरहरुले २०७६ चैत देखि २०७७ माघसम्म पाउनुपर्ने कुल जोखिम भत्ता हिसाब गरि अद्यावधिक गर्ने र त्यसैको आधारमा बाकी भत्ता उपलब्ध गराउने सहमति भएको छ ।
३. अब उप्रान्त जोखिम भत्ता र कोभिड व्यवस्थापन सम्बन्धि अस्पतालले गर्ने हरेक महत्वपूर्ण निर्णयमा आरएनले तोकेको प्रतिनिधिको अनिवार्य सहभागिता सुनिश्चित गर्ने सहमती भएको छ।
४. आन्दोलनरत रेजिडेन्ट डाक्टरहरुले आजैका मितिदेखी आन्दोलनका सम्पुर्ण कार्यक्रमहरु स्थगित गर्ने सहमति भएको छ।
