फाइल तस्बिर काठमाडौं- सरकारले कोभिड–१९ को परीक्षणका लागि गरिने पिसिआर शुल्क घटाएको छ। स्वास्थ्य तथा जनसङ्ख्या मन्त्रालयका प्रवक्ता डा जागेश्वर गौतमले अबदेखि सरकारी प्रयोगशालामा पिसिआर शुल्क एक हजार लिने निर्णय भएको जानकारी दिएका हुन्।
यसअघि पिसिआर परीक्षण शुल्क २ हजार लिने गरिएको थियो। यस्तै अबदेखि कोभिड–१९ को उपचार सरकारी अस्पतालमा मात्र गर्ने भएको छ।
यसअघि निजी अस्पताल र मेडिकल कलेजमा पनि कोभिड–१९ को उपचार गराइरहेको सरकारले अब सरकारी अस्पतालमा मात्र उपचार गर्ने निर्णय गरेको मन्त्रालयका प्रवक्ता डा गौतमले जानकारी दिए।
स्वास्थ्य तथा जनसङ्ख्या मन्त्री हृदयेश त्रिपाठीसहित सचिव लक्ष्मण अर्यालको संयोजकत्वमा आज बसेको ‘इन्सिडेन्ट कमान्ड सिस्टम’को बैठकले अब सरकारी अस्पतालमा मात्र उपचार गर्ने निर्णय गरेको हो।
मन्त्रालयले यसअघि कोभिड–१९ को उपचारका लागि तोकिएका मेडिकल कलेजमा आजसम्म भर्ना भई उपचार रहेका कोभिड–१९ का सङ्क्रमितको १० दिनको मात्र शोधभर्ना उपलब्ध गराउने भएको उनले जानकारी दिए।
हालसम्म नेपालमा दुई लाख ७२ हजार ३४९ सङ्क्रमित भएका छन्। यस्तै दुई लाख ६८ हजार ५४९ निको भएका छन् भने २ हजार ४७ जना सङ्क्रमितको निधन भएको छ। -रासस
