काठमाडाैं- शिक्षा र स्वास्थ्य क्षेत्रमा भएको राजनीतिकरण र भ्रष्टाचारविरुद्ध धर्ना दिन पुगेका बृहत् नागरिक आन्दोलनका अभियन्ता र चिकित्सकहरु पक्राउ परेका छन्।
सिंहदरबार दक्षिण गेटमा धर्ना दिन पुगेका उनीहरुलाई प्रहरीले पक्राउ गरेको हो। अभियन्ताहरु खगेन्द्र संग्राैला, नारायण वाग्ले, श्रवण मुकारुङ, नारायण ढकाल, अर्चना थापा, डा कुम्भराज जोशी, डा एलबी बस्नेत, शीशी विक्रम कार्की, प्रणेतालगायत पक्राउ परेका छन्। उनीहरुलाई प्रदर्शनीमार्गस्थित नेपाल पुलिस क्लबमा राखिएको बताइएको छ।
शिक्षा र स्वास्थ्य क्षेत्रमा चरम राजनीतीकरण र भ्रष्टाचार भएको भन्दै नागरिक आन्दोलनले आज त्यसविरुद्ध धर्ना कार्यक्रम राखेको थियो। पूर्वनिर्धारित समय ११ बजे धर्ना दिन पुगेका अभियन्ताहरुलाई धर्ना बस्नुअघि नै प्रहरीले पक्राउ गरेकाे हो।
पछिल्लो समय बिपी कोइराला स्वास्थ्य विज्ञान प्रतिष्ठान धरानका चिकित्सक तथा स्वास्थ्यकर्मी आन्दोलनमा छन्। उनीहरुको मागमा समर्थन गर्दै नागरिक आन्दोलनका अभियान्ताले काठमाडौंमा पनि विभिन्न कार्यक्रम गर्दै आइरहेका छन्।
