काठमाडौं– कोरोना भाइरसको संक्रमितको संख्या पछिल्लो एक सता यता फेरि बढ्न थालेको छ। काठमाडौं उपत्यकासहित जिल्लाहरुमा समेत संक्रमितको संख्या बढ्दा अस्पतालका कोभिड शय्या भरिन थालेको छ।
निषेधाज्ञा खुकुलो भएसँगै कोरोना संक्रमणको दर बढेको र अस्पतालहरुमा संक्रमित बिरामीको चाप देखिन थालेपछि अन्य स्वास्थ्य सेवा पनि प्रभावित हुनसक्ने देखिएको छ।
स्वास्थ्य तथा जनसंख्या मन्त्रालयका अनुसार दुई साताअघि सम्म दैनिक २ हजार संक्रमित थपिँदै आएकोमा अहिले फेरि उक्त संख्या बढेर झण्डै चार हजार पुग्न थालेको छ।
कोरोना संक्रमितको चाप फेरि बढ्न थालेपछि त्रिवि शिक्षण अस्पतालले आइतबार चिकित्सकहरुबीच छलफल समेत गरेको अस्पतालका सूचना अधिकारी राम विक्रम अधिकारीले जानकारी दिए।
अहिलेकै अवस्थामा अस्पतालमा भर्ना हुने क्रम बढ्दै गए केही दिनमा अन्य स्वास्थ्य सेवा प्रभावित हुनसक्ने अधिकारीको भनाइ छ।
‘बिरामीको संख्या बढिरहेको छ, आज पनि हामीले मिटिङ गरेका थियौं, अब कसरी जाने भनेर,’ उनले भने, ‘अरु डिपाटमेन्र्टहरु फेरि बन्द गरेर कोभिडको लागि पूर्ण तयारी गर्नुपर्ने अवस्था आउँछ कि भनेर आज छलफल भएको हो।’
अधिकारीका अनुसार गतसाता एकसय भन्दा कम संक्रमित उपचाररत रहेको अवस्थामा अहिले संक्रमितको चाप बढेको छ।
टिचिङ अस्पतालको जनरल वार्डमा ८५, कोभिड आइसीयू तथा भेन्टिलेटरमा १८ जना, अक्सिजन सपोर्टमा ११ जनार आकस्मिक कक्षमा ११ जना उपचाररत रहेको पनि अधिकारीले जानकारी दिए।
त्रिवि शिक्षण अस्पतालजस्तै टुकुस्थित शुक्रराज ट्रपिकल तथा सरुवा रोग अस्पतालमा पनि कोरोना संक्रमितको चाप बढेको छ।
अस्पतालका निर्देशक डा अनुप बास्तोलका अनुसार आइतबार साँझसम्म आकस्मिक कक्षमा ८ जना, कोभिड वार्डमा ३५ जना, आइसीयू तथा भेन्टिलेटरमा २४ जना, क्याविनमा ९ जना उपचाररत छन्।
बिस्तारै कोरोना संक्रमणको ग्राफ उकालो लागेकाले केही साता मै संक्रमितलाई बेड अभाव हुनसक्ने स्थिती आउन सक्ने डा बास्तोलाले बताए।
‘निषेधाज्ञा खुकुलो भएपछि मानिसहरुले जनस्वास्थ्यको मापदण्ड पालना गर्नै छाडे, संक्रमण बढ्न थालेको छ,’ उनले भने, ‘फेरि बिरामीलाई बेड अभाव हुने अवस्था आउनसक्छ।’
टिचिट र टेकु अस्पताल जस्तै वीर, पाटन, सिभिल अस्पताल लगायतका अस्पतालहरुमा पनि कोरोना संक्रमितको चाप बढ्न थालेको छ।
कोरोना संक्रमणको दर बढ्दै गएकाले दोस्रो लहरकै अवस्था आउन नदिन विशेष सावधानी अपनाएर जनस्वास्थ्यको मापदण्ड पालना गर्नुपर्ने चिकित्सकहरुले बताएका छन्।
टिचिङ, वीर जस्तै उपत्यकाका अन्य अस्पतालहरु पाटन, निजामती, सशस्त्र प्रहरी अस्पताल बलम्बु लगायतका अस्पतालमा पनि उपचारका लागि आउने संक्रमितको संख्या बढ्दो क्रममा रहेको बताइएको छ।
