काठमाडौं- स्थानीय तह निर्वाचनअन्तर्गत काठमाडौँ महानगरपालिकाको मतगणनास्थल राष्ट्रिय सभागृहमा ओम समाज डेण्टल अस्पताल र लायन्स क्लब काठमाण्डू युनिकको सहकार्यमा निःशुल्क स्वास्थ्य शिविर सञ्चालन भएको छ।
सो स्थलमा मतगणनाकार्य सम्पन्न नभएसम्म उपस्थिति हुने उम्मेदवार, निर्वाचन सम्पन्न गराउन खटिएका मतदान अधिकृत, कर्मचारी, सुरक्षाकर्मी, पत्रकार र स्वयंसेवकसमेतलाई रक्तचाप परीक्षण, अन्य आवश्यक प्राथमिक उपचारलगायतलाई ध्यान राखेर शिविर सञ्चालन गरिएको अस्पतालका जनसम्पर्क अधिकृत धनप्रसाद घिमिरेले जानकारी दिए।
चावहिलस्थित सो अस्पताल दन्त्य चिकित्सामा लोकप्रिय मानिन्छ। लायन्स क्लब काठमाण्डू डिष्ट्रिक्ट ३२५, ‘एफ’का गभर्नर डा राजेन्द्र गिरीले आफूहरुले यस प्रकारका सामाजिक सेवाका कार्यलाई निरन्तरता दिने क्रममा शिविर सञ्चालन गरिएको बताए।
लायन्स क्लब काठमाण्डू, युनिकका चिफ गणेश केसीले शिविरमा कुनै व्यक्तिलाई स्वास्थ्यमा कठिनाइ भएमा तत्काल अस्पताल लैजान तयारी हालतमा एम्बुलेन्सलाई पनि सभागृहमै राखिएकाले सो शिविरको सदुपयोग गर्न आग्रह गरे।
मुलुकककै सबैभन्दा ठूलो महानगरको मतगणना शनिबार बिहानदेखि सुरु भएको थियो। रासस
