समाचार

बागलुङ : हटियामा दुई करोड १६ लाखको स्वास्थ्यचौकी भवन निर्माण

स्वास्थ्य खबरपत्रिका

गलकोट- बागलुङको गलकोट नगरपालिका–३ हटिया बजारमा हटिया स्वास्थ्यचौकीको नयाँ भवन निर्माण भएको छ। जनतालाई सर्व–सुलभ तरिकाले स्वस्थ्य सेवा पु¥याउन सुविधा सम्पन्न भवन निर्माण गरिएको शहरी विकास तथा भवन कार्यालयले जनाएको छ। 

शहरी विकास कार्यालयले दुई करोड १६ लाख १७ हजार लागतमा सो भवन निर्माण गरेको हो। नयाँ बाटो जुम्ली निर्माण कम्पनीले ठेक्कामार्फत २०७१ पुसमा उक्त भवन निर्माण थालेको थियो। भवनको पूर्वाधार निर्माण गरेर शहरी विकास तथा भवन कार्यालयमार्फत स्वास्थ्यचौकी व्यवस्थापन समितिलाई हस्तान्तरणको तयारी भइरहेको नयाँ बाटो जुम्ली निर्माण सेवाका सञ्चालक कुमार खड्काले बताए। 

‘हाल सेवा दिइरहेको स्वास्थ्य चौकी भवन निकै पुरानो र साघुँरो छ’ हटिया स्वास्थ्यचौकीका प्रमुख तथा वरिष्ठ स्वास्थ्य सहायक दिलु सुवेदीले भनिन्, ‘बिरामीलाई भौतिक संरचनाको अभावमा एउटै कोठाबाट फरकफरक सेवा दिन बाध्य थियौँ नयाँ भवनम सरेपछि यस्तो समस्या हटेर जानेछ।’ सुवेदीका अनुसार अन्य वडाका स्वास्थ्यचौकीमा भन्दा यहाँ बिरामीको चाप धेरै हुने गरेको छ। बर्थिङ सेन्टरका लागि छिमेकी वडा काँठेवास, दुदीलाभाटी तथा हरिचौरबाट समेत गर्भवती आउने गरेको हुँदा नयाँ भवनले सेवा प्रवाहमा निकै सहज पु¥याउने सुवेदीको भनाइ रहेको छ।

भुकम्प प्रतिरोधी १७ कोठाको दुई तले भवनमा प्रशासनिक, स्वास्थ्यकर्मी आवास, बिरामी उपचार, औषधि भण्डार कक्षको छुट्टाछुट्टै व्यवस्था गरिएको शहरी विकासका इञ्जिनीयर तेजेन्द्रप्रसाद शर्माले बताए। हटिया स्वास्थ्यचौकीबाट गलकोट नगरपालिका–३ हटियालगायत छिमेकी वडाका बासिन्दाले सेवा लिँदै आएका छन् । कार्यालयका अनुसार बुङ्गादोभान स्वास्थ्यचौकी पनि निर्माण सम्पन्न भई हस्तान्तरणको प्रक्रियामा रहेको छ। रासस
 

swasthyakhabar

प्राप्त प्रतिकृयाहरू

यसमा तपाइको मत

प्रतिकृया दिनुहोस

पढ्नै पर्ने

Nepali Live