काठमाडौं - आन्दोलित औषधि व्यवसायी र औषधि व्यवस्था विभागबीच आज छलफल भएको छ। माग सम्बोधनका विषयमा भएको छलफल सकारात्मक भएपनि निष्कर्ष विहीन बनेको छ।
विभागका महानिर्देशक नारायण प्रसाद ढकालसँग भएको वार्ता सकारात्मक भएपनि कुनै निष्कर्ष ननिस्किएको आन्दोलन संघर्ष समितिका संयोजक शुभमान श्रेष्ठले बताए।
उनले भने, ‘विभागका डिजीसँग भएको छलफलमा उहाँले मैले जति सक्छु सहजीकरण गर्छु। तर नसकेको विषयमा स्वास्थ्य मन्त्रालयसँग बसेर छलफल गर्नुपर्छ भन्नुभयो।’
उनका अनुसार औषधि ऐन २०३५ को दफा ११ को उपदफा ३ र ५ लाई संशोधन वा खारेज गर्ने विषय छलफलमा उठेको थियो। सो विषयमा विभागका महानिर्देशकले आफुले संशोधन भएको व्यवस्थालाई खारेज गर्न नसक्ने बताएको श्रेष्ठले जानकारी दिए।
यद्यपि सोमबार बिहान १० बजे स्वास्थ्य मन्त्रालयका सचिव, औषधि व्यवस्था विभाग र औषधि व्यवसायी संघको त्रिपक्षीय वार्ता हुने सहमति जुटेको छ। आफ्ना माग सम्बोधन नहुँदासम्म धर्ना लगायत विरोधका कार्यक्रम यथावत रहने संघले जनाएको छ।
