काठमाडौं- प्रतिनिधिसभा सदस्य निर्वाचनलाई लक्षित गरी निर्वाचन आयोगले आजैदेखि देशभर मादक पदार्थको बिक्री-वितरण र सेवनमा पूर्ण प्रतिबन्ध लगाएको छ।
उच्चस्तरीय निर्वाचन सुरक्षा समितिको बैठकले गरेको निर्णयअनुसार, मतदानको मितिभन्दा सात दिन अगाडिदेखि निर्वाचनको अन्तिम परिणाम घोषणा नभएसम्मका लागि यो नियम कडाइका साथ लागू गरिएको हो।
निर्वाचन सुरक्षा (व्यवस्थापन) निर्देशिका २०७८ को प्रावधान बमोजिम निर्वाचनलाई स्वच्छ, विश्वसनीय र भयरहित वातावरणमा सम्पन्न गर्न मदिराजन्य पदार्थको कारोबार र प्रयोगलाई मुख्य चुनौती मान्दै यो कदम चालिएको हो।
मदिरा निषेधसँगै निर्वाचन सुरक्षा योजनालाई थप कसिलो बनाउन आयोगले फागुन १८ गते राति १२ बजेदेखि निर्वाचन प्रचारप्रसारमा समेत रोक लगाउने निर्णय गरेको छ। यस 'मौन अवधि' मा आचारसंहिता उल्लंघन गर्ने र मदिरा सेवन गरी शान्ति सुरक्षामा खलल पुर्याउने जो-कोहीलाई निर्वाचन (कसुर तथा सजाय) ऐन, २०७३ बमोजिम तत्काल पक्राउ गरी कारबाही गर्न गृह मन्त्रालयले सबै जिल्लाका प्रमुख जिल्ला अधिकारी र सुरक्षा निकायहरूलाई निर्देशन दिइसकेको छ।
जिल्ला आचारसंहिता अनुगमन समितिले समेत विशेष संयन्त्र परिचालन गरी मदिराको लुकीछिपी बिक्री र प्रयोग भइरहेको पाइएमा प्रचलित कानुन अनुसार कडा कदम चाल्ने चेतावनी दिएको छ।
त्यसैगरी, मतदानको दिन अर्थात् फागुन २१ गतेका लागि सवारी साधन सञ्चालनमा समेत विशेष प्रतिबन्ध लगाइएको छ।
फागुन २० गते राति १२ बजेदेखि मतदान सम्पन्न नभएसम्मका लागि एम्बुलेन्स, दमकल, र सुरक्षा निकाय जस्ता अत्यावश्यक सेवाका साधनबाहेक अन्य निजी तथा सार्वजनिक सवारी साधन चलाउन पाइने छैन।
निर्वाचनलाई मानवीय र भौतिक दुवै हिसाबले सुरक्षित बनाउन आयोगले मदिरा नियन्त्रणदेखि यातायात व्यवस्थापनसम्मका सम्पूर्ण पूर्वतयारी पूरा गरिसकेको छ।
