इलाम — चिकित्सा शिक्षा सुधारका अभियन्ता डा. गोविन्द केसीको स्वास्थ्य अवस्था नाजुक बन्दै गएको छ। श्वासप्रश्वासमा कठिनाइ भएपछि उहाँलाई अक्सिजन दिएर उपचार सुरु गरिएको छ।
उपचारमा संलग्न चिकित्सकहरूले उहाँको स्वास्थ्य अवस्थालाई मध्यनजर गर्दै थप सुविधा सम्पन्न अस्पतालमा स्थानान्तरण गर्न सुझाव दिएका छन्। स्वास्थ्य अवस्था जटिल बन्दै गएपछि उहाँको उपचार र थप व्यवस्थापनका विषयमा चिकित्सकहरू चिन्तित बनेका छन्।
यसैबीच, इलाम अस्पतालले डा. केसीको स्वास्थ्य अवस्थाको नियमित निगरानी तथा आकस्मिक उपचारको व्यवस्था मिलाउन र्यापिड रेस्पोन्स टिम (Rapid Response Team) गठन गरेको छ।
अस्पतालद्वारा जारी पत्रअनुसार उक्त टोलीमा मेडिकल सुपरिटेन्डेन्टको संयोजकत्वमा कन्सल्टेन्ट फिजिसियन, एनेस्थेसियोलोजिस्ट र मेडिकल अधिकृत रहने व्यवस्था गरिएको छ।
टोलीले डा. केसीको स्वास्थ्य अवस्थाको नियमित अनुगमन तथा मूल्याङ्कन गर्ने र आवश्यकताअनुसार तत्काल स्वास्थ्य सेवा एवं आकस्मिक उपचार उपलब्ध गराउने जिम्मेवारी पाएको छ।
श्वासप्रश्वासमा समस्या देखिएपछि अक्सिजनको सहायतामा उपचार गर्नुपर्ने अवस्था आएको र चिकित्सकहरूले सुविधासम्पन्न अस्पतालमा लैजान सुझाव दिएको घटनाले डा. केसीको स्वास्थ्य अवस्थाप्रति थप चासो बढाएको छ।
डा. केसीको स्वास्थ्य अवस्था थप जटिल हुन नदिन समयमै उपयुक्त उपचार र आवश्यक स्वास्थ्य सुविधा सुनिश्चित गर्नु अहिलेको प्रमुख आवश्यकता देखिएको छ।
